"எருது உடையான் வேளாளன் ஏலாதான் பார்ப்பான்;
ஒரு தொடையான் வெல்வது கோழி;உருவோடு
அறிவு உடையாள் இல்வாழ்க்கைப் பெண் என்ப ;
செறிவு உடையான் சேனாபதி"
இல்லாள் பரிசு
வருடத்திற்கொருமுறை பண்ணையில் பழுதான பொருட்களையும், வீட்டு உபயோகப்பொருட்கள் சிலவற்றையும் மாற்ற வேண்டிய சூழ்நிலையேற்படலாம். நாம் நம்முடைய தேவைக்குப்போக மீதியை தினசரி கடைவிரித்ததில் கிடைத்த உபரி… வாரச்சந்தையில் பொருட்களை கடைவிரித்ததின்மூலம் கிடைத்த உபரி…
மாதச்சந்தையில் மதிப்புக்கூட்டுப்பொருட்களை விற்றதின்மூலம் கிடைத்த உபரி என பண்ணையையும், வீட்டையும் மிகச்சரியாக நிர்வாகம் செய்திருக்கும் ஆய்ச்சியர் கைகளில் நிச்சயம் ஏராளமாக செல்வமிருக்கும்.
ஒருசில சந்தைகள் வாரந்தோறும் இயங்கினாலும் திருவிழா மற்றும் பண்டிகைக்காலங்களில் சிறப்பு சந்தைகளாக மாறும். அப்படிப்பட்ட சந்தைகளில் எது நமக்கு பிடித்தமான சந்தையாக விளங்குகிறதோ அந்த சந்தையை தேர்வு செய்து பொருட்களை கொள்முதல் செய்து வரலாம். வருடத்திற்கொருமுறை நாம் நுகரப்போகும் பொருட்களுக்கு நம் வீட்டு பெண்களே நிதியமைச்சர். எனவே வருடத்திற்கொருமுறை அவர்களையும் சந்தைக்கு அழைத்துச்சென்று அவர்களுக்கு பிடித்தமான பொருட்களை வாங்கிக்கொண்டு வர தற்சார்பு நிலைத்திருக்கும்.
எகா:
- அந்தியூர் சந்தை
- போச்சம்பள்ளி சந்தை
- பல்லாவரம் சந்தை
- மதுரை ஞாயிறு சந்தை
வீட்டு உபயோகப்பொருட்கள்
- சமையலுக்குத்தேவையான மண்பாண்ட ம், மத்து, முறம், மூங்கில் கூடை உள்ளிட்ட பொருட்கள்...
- தலையனை, மிதியடி, கோரைப்பாய், பனையோலைப்பாய் மற்றும் நமக்கு தேவையான துணி வகைகள் உள்ளிட்ட பொருட்கள்....
- வீட்டையும், பண்ணையையும் புதுபிக்க பயன்படும் சுண்ணாம்பு, காதி, பனைநார் மற்றும் தென்னந்தூம்பு உள்ளிட்ட பொருட்களை வருடத்திற்கொருமுறை வாங்கிவர தற்சார்பு மேம்படும்.
தமிழகத்திற்கென்று பல வகையான மாட்டினங்கள் இருக்கின்றது.அதில் நம்முடைய நிலத்திற்குத்தேவையான இனம் எதுவோ அதை சந்தைகளில் தேர்வுசெய்து வாங்கலாம்.
தற்போதைய முதலாளித்துவத்தின் கோரக்கரங்கள் பசுவினங்களின் பிறப்புறுப்புவரை நீள்கிறது. அவற்றின் கைகள் நம் பண்ணைவரை நீளாதிருக்க பொலிக்காளையொன்றை சந்தையிலிருந்து தருவித்து வளர்த்து வருதலின் மூலம் தடுக்க முடியும்.
நிலத்தில் ஏறுபூட்டவும், மாட்டுவண்டி இழுக்கவும் பழக்கப்படுத்தப்பட்ட ஜோடிகள் சந்தையில் விற்பனைக்கு வரும். அவற்றில் நமக்கு பிடித்தமானதை பண்ணைக்கு வாங்கிவந்து பயன்பாட்டிற்கு கொண்டுவர தற்சார்பு வாழ்க்கை சிறப்புறும்.