"கண்ணி மருப்பின் அண்ணல் நல்ஏறு
செங்காற் பதவின் வார்குரல் கறிக்கும்
மடக்காண் மரையா நோக்கி வெய்துறறு;"
சுயஅரிப்பு
- நாம் மேற்கொள்ளும் தற்சார்பு வாழ்க்கை நல்லதிசையில் நகர்ந்து உபரி மிகுதியாகும்போதெல்லாம் நம் வாழ்க்கை முறைக்கு ஒத்திசைவான காரியங்களில் கவனம் செலுத்த வேண்டுமே தவிர அதிலிருந்து விலகி கார் வாங்கலாமா? கப்பல் வாங்கலாமா? என்று மனதை அலைபாய விடக்கூடாது.
- நாம் நமக்கு பிடித்தமான காரியங்களில் கவனம் செலுத்தி வாழ்ந்தாலும் சுற்றமும் நட்பும் சும்மா இல்லாமல் சுரண்டிக்கொண்டேயிருக்கும். எப்படி நம் உடம்பில் அரிப்பு ஏற்படும்போது நாமே சொரிந்து சுகம் காண்கிறோமோ அதேபோல் நாமும் நம்முடைய வாழ்க்கையில் பிறர் தலையீடுல்லாமல் பார்த்துக்கொள்ள தற்சார்பு வாழ்க்கையில் நிறையவே வழிகள் இருக்கிறது.
- அஃது யாதெனில் தற்சார்பு விளையாட்டுக்குத்தேவையான ஆநிரைகளை மொத்தமாக கொள்முதல் செய்யவும், அவற்றை விளையாட்டுக்குப்பழக்குவதும் ஆகும்.
விளையாட்டு
மூக்கணாங்கயிற்றை அறுத்தவுடன் வாடியிலிருந்து சீறிப்பாயும் காளைகளையும், அதனை அடக்கும் காளையர்களையும் ஒளிப்படங்களில் நீங்கள் பார்த்திருக்கக்கூடும். ஆனால் ஜல்லிக்கட்டிற்குத்தேவையான கன்றுகளை தேர்வுசெய்வதில் துவங்கி, நீச்சலுக்கு பழக்குவது, பெரிய வாடிக்கு வருவதற்கு முன்பு சின்னதாக வாடிகட்டி காளையும், காளையரும் ஒத்திகை பார்ப்பது வரை பாரிய உழைப்பைக்கோரி நிற்கும் ஒவ்வொரு மரபு விளையாட்டும். விளையாட்டுக்கு காளைகளைப்பழக்குவது, காளைகளுடன் நாம் விளையாடுவது, விளையாட்டில் காளைகளுக்கு அடிபட்டுவிட்டால் அதற்கு முறையான மருத்துவம் செய்வது, என அது நம்முன்னே நிறைய துறைகளை திறந்து வைத்திருக்கும்.
அதேபோல் ரேக்ளாவுக்கு காளைகளைப்பழக்குவதும், அதற்குத்தேவையானமாட்டு வண்டிகளை தயார்செய்வதும் பாரிய உழைப்பைக்கோரி நிற்கும் ஒரு விளையாட்டு வடிவம்தான். அதில் நம்மையும் ஈடுபடுத்திக்கொள்ளும்போது நம் வாழ்க்கை எல்லையில்லாத திசையை நோக்கி வளர்ந்துகொண்டேயிருக்கும்.