"காடுஉறை இடையன் யாடுதலைப் பெயர்க்கும்
மடிவிடு வீளை கவரீஇ குறுமுயல்
மன்ற இரும்புதல் ஒளிக்கும்"

ஆடு மாடுகளை மேய்ச்சலுக்குட்படுத்தி கிடைபோடும் கீதாரிகளோடு பயணப்படும்பொழுது வெயில், மழையை எப்படி எதிர்கொள்வது, நீர் உள்ள இடங்களை கண்டடைவது, கிடையமர்த்தும் இடங்களை தேர்வு செய்வது, நோயுறும் காலத்தில் மருத்துவ முறைகளை தெரிந்துகொள்வது என ஒரு முழுமையான ஆநிரை மேலாண்மை அறிவைப்பெறமுடியும்.

முல்லைநில மூதாட்டிகளிடம் கற்றுக்கொள்ள நிறையவே செய்திகளிருக்கிறது. அதில் ஆநிரைகளை பராமரிப்பது மட்டுமல்ல. பால் பொருட்களை மதிப்புகூட்டுவது , வாடூன் தயாரிப்பது, எளிமையான சமையல் என அவர்களிடம் தெரிந்துகொள்ள செய்திகள் ஏராளம்.

கிராமத்து திருவிழாக்களில் கலந்து கொள்வதின் மூலம் மக்கள் எப்படி ஒருங்கிணைகிறார்கள்? திருவிழாவின் நோக்கம், மக்கள் ஒன்றுதிரள்வதின்மூலம் ஏற்படுகிற சின்ன சின்ன முரண்பாடுகளை கலைந்து எப்படி கருத்துக்களையும், உழைப்பையும் பகிர்ந்துகொள்கிறார்கள் என்பதையும் கற்றுக்கொள்ள தற்சார்பு மேம்படும்.